തിരുവനന്തപുരം : നീണ്ട എട്ട് വർഷത്തെ കാത്തിരിപ്പിന് അറുതി വരുത്തി വിഴിഞ്ഞം അന്താരാഷ്ട്ര തുറമുഖത്ത് ആദ്യ കപ്പൽ അടുത്തു.
നാടിന്റെ സ്വപ്ന സാഫല്യം ആഘാേഷമാക്കി സർക്കാറും ജനങ്ങളും . നാളെ നടക്കുന്ന സ്വീകരണ ചടങ്ങിൽ ആയിരങ്ങൾ പങ്കെടുക്കും. ഇതോടെ വിഴിഞ്ഞം എന്ന പുരാതന തുറമുഖം വീണ്ടും ലാേക ഭൂപടത്തിൽ സ്ഥാനം പിടിക്കും. അന്താരാഷ്ട്ര കപ്പൽ ചാനലിന് ഏറെ അടുത്തായി പ്രകൃതി കനിഞ്ഞരുളിയ സ്വാഭാവിക ആഴത്തോട് കൂടിയ തുറമുഖം ഇന്ത്യയുടെ തന്നെ തുറമുഖ കവാടമായി മാറും. ചൈനയിൽ നിന്ന് കൂറ്റൻ ക്രെയിനുകളുമായെത്തിയ ഷെൻ ഹുവ 15 എന്ന ചരക്ക് കപ്പൽ തുറമുഖ വാർഫിൽ അടുക്കുന്ന ധന്യ മുഹൂർത്തത്തിന് സാക്ഷിയാകാൻ നാടിന്റ നാനാദിക്കിൽ നിന്നായി ആയിരങ്ങൾ അണിചേരും. സ്വപ്ന പദ്ധതിയുടെ വിജയമാഘോഷിക്കാൻ എത്തുന്ന ജനത്തെ സ്വീകരിക്കാനായുള്ള കൂറ്റൻ പന്തൽ പൂർത്തിയായി. തുറമുഖ കവാടമായ മുല്ലൂരിൽ നിന്ന് ഒരു കിലോമീറ്റർ ഉള്ളിൽ നിർമ്മിക്കുന്ന പന്തലിലേക്ക് അതിഥികളായി വരുന്ന പൊതു ജനത്തിന് പന്തലിലെത്താൻ അധികൃതർ വാഹന സൗകര്യമൊരുക്കും. ഇതിനായിഉച്ച മുതൽ രണ്ടര വരെ തുടർച്ചയായി ഓടുന്നതിനുള്ള വാഹനങ്ങൾ ഒരുക്കിക്കഴിഞ്ഞു. നാളെ വൈകുന്നേരം മുഖ്യമന്ത്രിയും കേന്ദ്ര , സംസ്ഥാന മന്ത്രിമാരും നൽകുന്ന ഊഷ്മള സ്വീകരണത്തിന് ശേഷം കപ്പലിൽ നിന്നും ക്രെയിനുകൾ വാർഫിലേക്ക് ഇറക്കുന്നതിനുള്ള നടപടികൾ ആരംഭിക്കും.ചൈനയിൽ നിന്ന് കപ്പലിൽ എത്തിയ സാങ്കേതിക വിദഗ്ദർക്കൊപ്പം അദാനി ഗ്രൂപ്പിന്റെ സാങ്കേതിക വിദഗ്ദരും ചേർന്നാണ് ക്രെയിനുകൾ ബർത്തിൽ സ്ഥാപിക്കുന്നതിന്റെ നടപടികൾ പൂർത്തിയാക്കുക. ചൈനയിൽ നിന്നെത്തിയവർക്ക് പുറത്തിറങ്ങാനുള്ള വിസ ലഭിച്ചില്ലെങ്കിലും ജീവനക്കാർ തുറമുഖം വിട്ട് പുറത്ത് പാേകാത്തതിനാൽ തുറമുഖത്ത് ഇറങ്ങി ദൗത്യം പൂർത്തിയാക്കുന്നതിന് തടസമില്ലെന്ന് അധികൃതർ പറയുന്നു. തുറമുഖത്തിന് ആറ് മാസത്തേക്ക് താല്കാലിക ഐഎസ്പിഎസ് സുരക്ഷാ കോഡും ലഭിച്ചതോടെ ഏതു സമയത്തും തീരത്ത് കപ്പലടുപ്പിക്കാനുമാകും