പതഞ്ജലി ആയുര്വേദിന്റെ തെറ്റിദ്ധരിപ്പിക്കുന്ന പരസ്യങ്ങള്ക്കെതിരായ കേസില് രണ്ടാഴ്ചയ്ക്കുള്ളില് നേരിട്ട് ഹാജരാകാന് ബാബാ രാംദേവിനോട് ആവശ്യപ്പെട്ട് സുപ്രീം കോടതി. പതഞ്ജലി ആയുര്വേദിന്റെ മാനേജിംഗ് ഡയറക്ടര് ആചാര്യ ബാലകൃഷ്ണയോടും ഹാജരാകാന് ആവശ്യപ്പെട്ടു. ഇരുവര്ക്കുമെതിരെ കോടതിയലക്ഷ്യ നോട്ടീസും നല്കിയിട്ടുണ്ട്.നേരത്തെ നിര്ദ്ദേശങ്ങള് നല്കിയിട്ടും കേസില് മറുപടി ഫയല് ചെയ്യാത്തതിനെ തുടര്ന്നാണ് ജസ്റ്റിസുമാരായ ഹിമ കോഹ്ലിയുടെയും അമാനുല്ലയുടെയും ബെഞ്ചിന്റെ നടപടി. ബാബാ രാംദേവിനോട് നേരിട്ട് ഹാജരാകാന് ആവശ്യപ്പെട്ടതിന് പുറമെ കോടതിയലക്ഷ്യത്തിന് പ്രോസിക്യൂട്ട് ചെയ്യാതിരിക്കാന് കാരണം കാണിക്കല് നോട്ടീസ് അയക്കാനും കോടതി ഉത്തരവിട്ടു. പതഞ്ജലി ആയുര്വേദ് തെറ്റിദ്ധരിപ്പിക്കുന്ന പരസ്യങ്ങള് പ്രചരിപ്പിച്ചതിനെതിരെ ഇന്ത്യന് മെഡിക്കല് അസോസിയേഷന് നല്കിയ ഹര്ജിയിലാണ് കോടതിയലക്ഷ്യ നോട്ടീസ് അയച്ചിരിക്കുന്നത്കോടതിയലക്ഷ്യ നോട്ടീസില് ഇതുവരെ മറുപടി ഫയല് ചെയ്യാത്തത് എന്തുകൊണ്ടെന്ന് ബാബ രാംദേവിന് വേണ്ടി ഹാജരായ മുതിര്ന്ന അഭിഭാഷകന് മുകുള് റോഹത്ഗിയോട് വാദം കേള്ക്കുന്നതിനിടെ കോടതി ചോദിച്ചു. ബാബാ രാംദേവിനെ കേസില് കക്ഷിയാക്കരുതെന്ന റോത്തഗിയുടെ ആവശ്യം കോടതി നിരസിച്ചു. എല്ലാ പരസ്യത്തിലും അദ്ദേഹം ഉണ്ടായിരുന്നു, അദ്ദേഹം ഒരു വാര്ത്താസമ്മേളനവും നടത്തി എന്നായിരുന്നു ഇതിനോടുള്ള കോടതിയുടെ പ്രതികരണം. കേസില് വാദം കേള്ക്കുന്നത് മാറ്റിവയ്ക്കാന് പോകുന്നില്ലെന്നും കോടതി വ്യക്തമാക്കി.രക്തസമ്മര്ദ്ദം, പ്രമേഹം, സന്ധിവാതം, ആസ്ത്മ, പൊണ്ണത്തടി തുടങ്ങിയ രോഗങ്ങള്ക്കായി ഉത്പാദിപ്പിക്കുന്ന മരുന്നുകളുടെ പരസ്യം പ്രസിദ്ധീകരിക്കുന്നതില് നിന്ന് ഫെബ്രുവരി 27-ന് പതഞ്ജലി ആയുര്വേദ്സിനെ സുപ്രീംകോടതി വിലക്കിയിരുന്നു.കോടതിയുടെ നോട്ടീസിനെ കുറിച്ച് ബാബ രാംദേവിന് കൃത്യമായ ധാരണയുണ്ടെന്ന് കോടതി ചൂണ്ടിക്കാട്ടി. അതിനാലാണ് കേസിൽ മൂന്നാമതൊരു മുതിർന്ന അഭിഭാഷകൻ ഹാജരാകുന്നതെന്ന് സുപ്രീം കോടതി അഭിപ്രായപ്പെട്ടു. സീനിയർ അഭിഭാഷകൻ മുകുൾ റോത്തഗിയാണ് പതഞ്ജലി ആയുർവേദയ്ക്ക് വേണ്ടി ഹാജരായത്. രണ്ടാഴ്ചയ്ക്ക് ശേഷം കേസ് വീണ്ടും പരിഗണിക്കും.