ഇന്ന് മഹാശിവരാത്രി. പുണ്യംതേടി ഭക്തര്. ശിവരാത്രി ആഘോഷത്തിന് ആലുവ മണപ്പുറം ഒരുങ്ങി. വെള്ളിയാഴ്ച അർധരാത്രിയോടെ ബലിതർപ്പണം ആരംഭിക്കും. അരിയാഹാരം ഉപേക്ഷിച്ച് ഒരിക്കലെടുത്ത് കാത്തിരുന്ന വിശ്വാസികൾ നറുക്കിലയിൽ ബലിപിണ്ഡം പിതൃക്കൾക്ക് സമർപ്പിച്ച് മടങ്ങും. കുംഭമാസത്തിലെ അമാവാസി നാളായ ഞായറാഴ്ച വരെ ബലിതർപ്പണം നടത്താം. ബലിതർപ്പണത്തിന് 75 രൂപയാണ് നിരക്ക്. ദേവസ്വം ബോർഡിന്റേതായി 31 വ്യാപാര സ്റ്റാളുകൾ മണപ്പുറത്തുണ്ടാകും. വെള്ളിയാഴ്ച പിതൃതർപ്പണത്തിനായി എത്തുന്നവർക്ക് സൗജന്യ ലഘുഭക്ഷണവും ചുക്കുവെള്ളവും ബോർഡ് ഒരുക്കിയിട്ടുണ്ട്. ലക്ഷാർച്ചനയോടെയാണ് ക്ഷേത്ര ചടങ്ങുകൾ ആരംഭിക്കുക. ക്ഷേത്രത്തിലെ അർധരാത്രിയിലെ ശിവരാത്രി വിളക്കിനു ശേഷം ഔദ്യോഗികമായി ബലിതർപ്പണം ആരംഭിക്കും.ശിവരാത്രി നാളിൽ മണപ്പുറം മഹാദേവ ക്ഷേത്രത്തിലെ ചടങ്ങുകൾക്ക് തന്ത്രി മുല്ലേപ്പിള്ളി ശങ്കരൻ നമ്പൂതിരി നേതൃത്വം നൽകും. ശിവരാത്രി നാളിൽ മണപ്പുറത്തെത്തുന്നവർക്ക് ഗ്രൂപ്പ് ഇൻഷുറൻസ് ഏർപ്പെടുത്തിയിട്ടുണ്ട്. വിവിധയിടങ്ങളിൽ കൂറ്റൻ ജലസംഭരണി സ്ഥാപിച്ച് കുടിവെള്ള വിതരണം നടത്തും.ആലുവ ശിവരാത്രിയോടനുബന്ധിച്ച് വെള്ളിയാഴ്ച വൈകീട്ട് നാലുമണി മുതൽ ശനിയാഴ്ച ഉച്ചയ്ക്ക് രണ്ടുമണി വരെ ആലുവ നഗരത്തിലും പരിസരത്തും ട്രാഫിക് നിയന്ത്രണങ്ങളും സുരക്ഷാ ക്രമീകരണങ്ങളും ഏർപ്പെടുത്തി.