തൃശ്ശൂര്: കളമശ്ശേരി ബോംബ് സ്ഫോടനത്തിന്റെ ഉത്തരവാദിത്തമേറ്റെടുത്ത് ഒരാള് കീഴടങ്ങിയതായി എ.ഡി.ജി.പി. കൊച്ചി സ്വദേശി ഡൊമിനിക് മാര്ട്ടിന് (48) എന്നയാളാണ് കൊടകര പൊലിസ് സ്റ്റേഷനില് കീഴടങ്ങിയത്. ബോംബ് സ്ഫോടനം നടത്തിയതിന്റെ ഉത്തരവാദിത്വം ഏറ്റെടുത്ത് കൊണ്ട് ഫെയ്സ്ബുക്കില് വീഡിയോ പങ്കുവെച്ചതിന് ശേഷമാണ് മാര്ട്ടിന് കീഴടങ്ങിയത്. സഭാ വിശ്വാസിയെന്ന് അവകാശപ്പെട്ട് എത്തിയ ഇയാള് ചില തെളിവുകള് ഹാജരാക്കിയതായും കൂടുതല് അന്വേഷണം നടക്കുകയാണെന്നും എഡിജിപി മാധ്യമങ്ങളോട് പറഞ്ഞു.
ഇന്ന് ഉച്ചയ്ക്ക് ഒന്നരയോടെയാണ് ഇയാള് സ്റ്റേഷനില് കീഴടങ്ങിയത്. സംഭവത്തിന് തൊട്ട് പിന്നാലെ ഇയാള് ഫെയ്സ് ബുക്ക് പേജില് ആറ് മിനുട്ട് ദൈര്ഘ്യമുള്ള വീഡിയോ പോസ്റ്റ് ചെയ്തിരുന്നു. യഹോവ സാക്ഷികള് രാജ്യദ്രോഹികളാണെന്നും അവരോട് പ്രതികരിക്കാനാണ് സ്ഫോടനം നടത്തിയതെന്നും ഇയാള് വീഡിയോയില് പറയുന്നുണ്ട്