തിരുവനന്തപുരത്ത് ബിജെപിയുടെ സ്ഥാനാർത്ഥിയായി ലോക്സഭാ മണ്ഡലം തിരഞ്ഞെടുപ്പിൽ മത്സരിക്കുന്ന രാജീവ് ചന്ദ്രശേഖറിന്റെ കൂടെ താൻ ഇരിക്കുന്ന തരത്തിൽ വ്യാജ ചിത്രം നിർമ്മിച്ച് സമൂഹമാധ്യമങ്ങളിൽ പ്രചരിപ്പിച്ച കേസിൽ ഡിസിസി അംഗത്തിനെതിരെ എൽഡിഎഫ് കൺവീനർ ഇ പി ജയരാജന്റെ ഭാര്യ പോലീസിൽ പരാതി നൽകിവ്യാജ ഫോട്ടോ നിർമ്മിച്ച് സമൂഹമാധ്യമങ്ങളിൽ പ്രചരിപ്പിച്ചതിന് തിരുവനന്തപുരം ഡിസിസി അംഗമായ ജോസഫ് ഡിക്രൂസിനെതിരെയാണ് എൽഡിഎഫ് കൺവീനർ ഇ പി ജയരാജന്റെ ഭാര്യ പി കെ ഇന്ദിര പോലീസിൽ പരാതി നൽകിയത്. നേരത്തെ ഇ പി ജയരാജന്റെ കുടുംബവും രാജീവ് ചന്ദ്രശേഖറും തമ്മിൽ ബിസിനസ് ബന്ധമുണ്ടെന്ന തരത്തിൽ കോൺഗ്രസ് ആരോപണം ഉന്നയിച്ചിരുന്നു. ഇതിനു പിന്നാലെ ഇന്ദിരയും രാജീവ് ചന്ദ്രശേഖറും ഒരുമിച്ച് ഇരിക്കുന്ന തരത്തിൽ ചിത്രം മോർഫ് ചെയ്ത് സമൂഹമാധ്യമങ്ങൾ വഴി പ്രചരിപ്പിക്കുകയായിരുന്നു.വ്യാജ ചിത്രം സമൂഹമാധ്യമത്തിൽ പങ്കുവെച്ചതിലൂടെ തന്നെയും തന്റെ ഭർത്താവിനെയും സമൂഹത്തിൽ ഇകഴ്ത്തി കാണിക്കാനാണ് ജോസഫ് ഡിക്രൂസ് ശ്രമിക്കുന്നത് എന്ന് ഇന്ദിര നൽകിയ പരാതിയിൽ പറയുന്നു. സംഭവത്തിൽ ഇ പി ജയരാജന്റെ വളപട്ടണത്തെ വീട്ടിലെത്തി പോലീസ് ഇന്ദിരയുടെ മൊഴി രേഖപ്പെടുത്തുകയും ചെയ്തിട്ടുണ്ട്..ഇന്ദിരയും രാജീവ് ചന്ദ്രശേഖറും ഒരുമിച്ച് ഇരിക്കുന്ന തരത്തിലുള്ള വ്യാജ ചിത്രം ജോസഫ് ഡിക്രൂസിന്റെ പേരിലുള്ള അക്കൗണ്ടിലാണ് വന്നതെന്നും പരാതിയിൽ പറയുന്നുണ്ട്. ഇന്ദിരയുടെ പരാതിയിൽ ജോസഫ് ഡിക്രൂസിനെതിരെ കേസെടുത്ത പോലീസ് കലാപം ഉണ്ടാക്കുക എന്ന ലക്ഷ്യത്തോടെ പ്രകോപനം സൃഷ്ടിക്കൽ, വ്യാജരേഖ ചമയ്ക്കൽ, അപകീർത്തിയുണ്ടാക്കൽ, വ്യാജരേഖ യഥാർത്ഥ എന്ന തരത്തിൽ ഉപയോഗിക്കുക തുടങ്ങിയ കുറ്റങ്ങളാണ് ചുമത്തിയിരിക്കുന്നത്.