ഭാരത് ജോഡോ ന്യായ് യാത്രയുടെ ഗാനം പുറത്തിറങ്ങി. ഭാരത് ജോഡോ ന്യായ് യാത്ര നയിക്കുന്ന കോണ്ഗ്രസ് മുന് അധ്യക്ഷന് രാഹുല് ഗാന്ധിയാണ് ഗാനം സാമൂഹിക മാധ്യമങ്ങളിലൂടെ പുറത്ത് വിട്ടത്. ഇതിനൊപ്പം തന്നെ ഭാരത് ജോഡോ ന്യായ് യാത്രയുടെ മുന്നൊരുക്കത്തിന്റെ ഭാഗമായി പൗരസമൂഹത്തോട് രാഹുല് ഗാന്ധി സംവദിക്കുകയും ചെയ്തു. യാത്രയില് ഉന്നയിക്കേണ്ട വിഷയങ്ങളാണ് രാഹുല് ഗാന്ധി പൗരസമൂഹത്തോട് ചോദിച്ചത്. ദളിത് ,ആദിവാസി, പിന്നാക്ക വിഭാഗങ്ങള് നേരിടുന്ന പ്രശ്നങ്ങള്, തൊഴിലില്ലായ്മ, വിലക്കയറ്റം തുടങ്ങിയ വിഷയങ്ങള് യാത്രയില് ഉന്നയിക്കണമെന്ന മറുപടിയാണ് ലഭിച്ചത്.
ഭാരത് ന്യായ് യാത്ര എന്ന് ആദ്യം പേരിട്ടിരുന്ന യാത്രയുടെ പേര് കഴിഞ്ഞ ആഴ്ചയാണ് ഭാരത് ജോഡോ ന്യായ് യാത്ര എന്നാക്കിയത്. പര്യടനം നടത്തേണ്ട സംസ്ഥാനങ്ങളുടെ എണ്ണത്തിലും അന്ന് ചേര്ന്ന എ ഐ സി സി യോഗം മാറ്റം വരുത്തിയിരുന്നു. 14 സംസ്ഥാനങ്ങളിലാകും യാത്രയെന്നാണ് ആദ്യം അറിയിച്ചിരുന്നതെങ്കില് പുതിയ തീരുമാന പ്രകാരം രാഹുലിന്റെ യാത്ര 15 സംസ്ഥാനങ്ങളിലെത്തും. പട്ടികയില് അരുണാചല് പ്രദേശാണ് പുതുതായി ഉള്പ്പെടുത്തിയത്.