കാസര്കോട് സ്വദേശിനിയായ യുവതി ഉന്നയിച്ച പീഡന പരാതിയില് ദുബായില് നിന്ന് പ്രതികരണവുമായി നടനും മോഡലുമായ ഷിയാസ് കരീം. പീഡന പരാതി നല്കിയ യുവതിയെയും മാധ്യമങ്ങളെയും അവഹേളിക്കുന്ന തരത്തിലാണ് സോഷ്യല്മീഡിയില് പോസ്റ്റ് ചെയ്തിരിക്കുന്ന വീഡിയോയില് പ്രതികരിച്ചിരിക്കുന്നത്. ചോദ്യം ചെയ്യലിന് പോലീസ് തയ്യാറെടുക്കുന്നതിനിടയിലാണ് ഫേസ്ബുക്ക് വഴി ഷിയാസിന്റെ അധിഷേപം. താന് ദുബായില് നിന്ന് കേരളത്തില് എത്തിയ ശേഷം മറുപടി നല്കുമെന്നാണ് ഷിയാസിന്റെ വാക്കുകള്.
വിവാഹ വാഗ്ദാനം നല്കി നിരവധി തവണ പീഡിപ്പിക്കുകയും ഗര്ഭഛിദ്രത്തിന് നിര്ബന്ധിച്ചെന്നുമാണ് യുവതിയുടെ പരാതി. കാസര്ഗോഡും എറണാകുളത്തും മൂന്നാറിലെ ഹോട്ടലിലും എത്തിച്ച് പീഡിപ്പിച്ചു എന്നാണ് യുവതിയുടെ പരാതിയില് പറയുന്നത്. ചന്തേര പോലീസ് സംഘം എറണാകുളത്തും മൂന്നാറിലുമെത്തി തെളിവുകള് ശേഖരിക്കാന് ഒരുങ്ങുകയാണ്.