വിഴിഞ്ഞം അന്താരാഷ്ട്ര തുറമുഖത്തേക്ക് ഷെന്ഹുവ-24 ഇന്ന് എത്തും. പുറംകടലില് നങ്കൂരമിട്ട കപ്പല് രാവിലെയോടെ ബെര്ത്തിലേക്ക് അടുപ്പിക്കും. വിഴിഞ്ഞത്ത് എത്തുന്ന മൂന്നാമത്തെ ചരക്കു കപ്പലാണ് ഷെന്ഹുവ-24. നവംബര് 10നാണ് ചൈനയില് നിന്ന് വിഴിഞ്ഞത്തേക്ക് ആവശ്യമായ 6 യാര്ഡ് ക്രെയിനുകളുമായി ഷെന്ഹുവ-24 യാത്ര തിരിച്ചത്. അടുത്തമാസം 15ഓടെ നാലാമത്തെ കപ്പല് തീരത്ത് എത്തും. 32 ക്രെയിനുകളാണ് ആദ്യ ഘട്ടത്തില് തുറമുഖത്തിന് ആവശ്യം വരുന്നത്.
നവംബര് 2നാണ് വിഴിഞ്ഞം അന്താരാഷ്ട്ര തുറമുഖത്തിന്റെ നിര്മ്മാണത്തിനാവശ്യമായ ക്രെയിനുമായി രണ്ടാമത്തെ കപ്പല് ഷെന്ഹുവ 29 എന്ന കപ്പല് എത്തിയത്. ഒരു ഷിപ്പ് ടു ഷോര് ക്രെയിന്, അഞ്ച് യാര്ഡ് ക്രെയിനുകള് എന്നിവയാണ് കപ്പലിലുണ്ടായത്. വിഴിഞ്ഞത്തെത്തിയ ആദ്യ കപ്പലായ ഷെന്ഹുവ 15 ഡിസംബര് 15ന് മൂന്ന് ക്രെയിനുകളുമായി വീണ്ടുമെത്തും.
ലോകശ്രദ്ധയാകര്ഷിക്കുന്ന തരത്തില് മാറാനാണ് വിഴിഞ്ഞം തുറമുഖം തയാറെടുക്കുന്നത്. വലിയ കപ്പലുകള്ക്ക് ബെര്ത്തിലടുക്കാനുള്ള പ്രകൃതിദത്തമായ 20 മീറ്റര് ആഴം ഇവിടെയുണ്ട്. അന്താരാഷ്ട്ര കപ്പല്ച്ചാലില് നിന്ന് 10 നോട്ടിക്കല് മൈല് അകലത്തില് കര ലഭിക്കുന്നു എന്ന പ്രത്യേകതയും വിഴിഞ്ഞത്തുണ്ട്.