കൊടുമ്പ് കരിങ്കരപ്പുള്ളി അമ്പലപ്പറമ്പ് പാല്നീരി കോളനിക്കു സമീപം യുവാക്കളുടെ മൃതദേഹം കുഴിച്ചിട്ട നിലയില് കണ്ടെത്തിയ സംഭവത്തില് സ്ഥലം ഉടമ കുറ്റം സമ്മതിച്ചു. കാട്ടുപന്നിയെ പിടിക്കാന് വെച്ച വൈദ്യുതക്കെണിയില് പെട്ടാണ് യുവാക്കള് മരിച്ചതെന്നും മൃതദേഹങ്ങള് കണ്ടപ്പോഴുണ്ടായ പരിഭ്രാന്തിയില് കുഴിച്ചിടുകയായിരുന്നെന്നുമാണ് ഉടമയുടെ മൊഴി.
സ്ഥലം ഉടമയായ അമ്പലപ്പറമ്പ് വീട്ടില് അനന്തന്(52) പൊലീസ് കസ്റ്റഡിയിലാണ്. യുവാക്കളുടെ മരണത്തിനു പിന്നില് മറ്റെന്തെങ്കിലും കാരണങ്ങളുണ്ടോ എന്ന് പൊലീസ് അന്വേഷിച്ചുവരികയാണ്.
ചൊവ്വാഴ്ച വൈകിട്ടോടെയാണ് കൊടുമ്പ് കരിങ്കരപ്പുള്ളി അമ്പലപ്പറമ്പ് പാല്നീരി കോളനിക്കു സമീപത്തെ നെല്പാടത്തു 2 യുവാക്കളുടെ മൃതദേഹം കുഴിച്ചിട്ട നിലയില് കണ്ടെത്തിയത്. പുതുശ്ശേരി കാളാണ്ടിത്തറയില് സതീഷ് (22), കൊട്ടേക്കാട് കാരക്കോട്ടുപുര തെക്കേംകുന്നം ഷിജിത്ത് (22) എന്നിവരാണു മരിച്ചതെന്നാണ് വിവരം.
ഞായറാഴ്ച രാത്രി വേനോലിയില് ഒരു സംഘവുമായുണ്ടായ സംഘട്ടനത്തെത്തുടര്ന്നു സതീഷ്, ഷിജിത്ത്, സുഹൃത്തുക്കളായ അഭിന്, അജിത്ത് എന്നിവര്ക്കെതിരെ കസബ പൊലീസ് കേസെടുത്തിരുന്നു. അന്വേഷണം നടക്കുന്നതിനിടെ 4 പേരും അമ്പലപ്പറമ്പില് സതീഷിന്റെ ബന്ധുവീട്ടിലെത്തിയിരുന്നു.
ഇതിനിടെ, പൊലീസ് സ്ഥലത്തെത്തിയെന്നു ഭയന്ന് ചൊവ്വാഴ്ച പുലര്ച്ചെ ഇവര് ബന്ധുവീട്ടില് നിന്നു പാടത്തേക്കിറങ്ങിയോടി. അഭിനും അജിത്തും ഒരു വശത്തേക്കും സതീഷും ഷിജിത്തും മറ്റൊരു ദിശയിലേക്കുമാണ് ഓടിയത്.
അഭിനും അജിത്തും പിന്നീട് വേനോലിയില് എത്തിയെങ്കിലും സതീഷിനെയും ഷിജിത്തിനെയും കണ്ടെത്താനായില്ല. ഫോണ് വിളിച്ചപ്പോഴും കിട്ടിയില്ല. ഇതോടെ അഭിനും അജിത്തും കസബ പൊലീസ് സ്റ്റേഷനിലെത്തി പരാതി നല്കി.
പൊലീസ് സംഘം പരിസരത്തു നടത്തിയ തിരിച്ചിലിലാണു പാടത്തു മണ്ണ് ഇളകിയ നിലയില് കണ്ടെത്തിയത്. മണ്ണു നീക്കിയപ്പോഴാണു മൃതദേഹങ്ങള് കണ്ടെത്തിയത്. തുടര്ന്ന് നടന്ന അന്വേഷണത്തിലാണ് സംഭവത്തിന്റെ ചുരുളഴിയുന്നത്.മൃതദേഹങ്ങള് ഇന്ക്വസ്റ്റ് നടപടികള്ക്കു ശേഷം പോസ്റ്റുമോര്ട്ടത്തിന് അയയ്ക്കും.