ഒറ്റശേഖരമംഗലം മഹദേവര് ക്ഷേത്രം, വലിയ ചുറ്റുമതിലനകത്ത് ഒരേ മാതൃകയില് തന്നെ കാണാവുന്ന മൂന്ന് ശ്രീകോവിലുകള്, രണ്ട് ശ്രീകോവിലുകളില് മഹാദേവനും ഒരു ശ്രീകോവിലില് മഹാവിഷ്ണുവും. ആയ് രാജാക്കന്മാരുടെയും ചോളരാജക്കാന്മാരുടെ കാലത്ത് നിര്മ്മിക്കപ്പെട്ട ക്ഷേത്രം. ഏതാണ്ട് മൂവായിരത്തോളം വര്ഷം പഴക്കമുണ്ട്. ഇന്ന് നാം കാണുന്ന രീതിയിലുളള ക്ഷേത്രം നിര്മ്മിച്ചത് ശ്രീമൂലം തിരുന്നാളിന്റെ കാലത്താണെന്നും പറയപ്പെടുന്നു.
![](https://keralitenews.com/wp-content/uploads/2024/01/ottasekharamangalam1-1024x603.jpg)
ഖരമുനിയുമായി ബന്ധപ്പെടാണ് ക്ഷേത്ര ഐതീഹ്യം. നേപ്പാളിനടുത്ത് ഖണ്ഡകി നദീയില് മുങ്ങിയപ്പോള് നാല് ശിവലിംഗങ്ങള് ലഭിച്ചു. ശ്രേഷ്ഠമായ മൂന്ന് സ്ഥലങ്ങളില് ശിവലിംഗ പ്രതിഷ്ഠ നടത്തി. വൈക്കവും, ഏറ്റുമാനൂരും, കടത്തുരുത്തിയും. അതിന് ശേഷം തന്റെ ശേഖരത്തിലെ ഒറ്റയായ നാലാമത്തെ ശിവലിംഗം ഇവിടെ പ്രതിഷ്ഠിച്ചുവെന്നാണ് ഐതീഹ്യം. ഖണ്ടകി നദിയുടെ മുഴുവന് പുണ്യവും സര്വ്വദേവഗണങ്ങളുടെ ഐശ്വര്യവും ഇവിടെയുണ്ട്.
മറ്റൊരു ഐതീഹ്യം ആഞ്ജനേയനുമായി ബന്ധപ്പെട്ടതാണ്. സീതാന്വേഷണ പുറപ്പെട്ട ശ്രീരാമന് പൂജയ്ക്കായി ഹിമാലയത്തില് നിന്ന് ഹനുമാന് നാല് ശിവലിംഗങ്ങളുമായി പുറപ്പെട്ടു. എന്നാല് വൈകിയതിനാല് മണ്ണ് കുഴച്ച് ശിവലിംഗം നിര്മ്മിച്ച് ശ്രീരാമന് പൂജ നടത്തി. അതാണ് രാമേശ്വരം. പിന്നീട് ഈ നാല് ശിവലിംഗങ്ങളില് മൂന്നെണ്ണം വൈക്കത്തും ഏറ്റുമാനൂരും , കടത്തുരിത്തിയും പ്രതിഷ്ഠിച്ചു. പിന്നീട് അവിടെയെത്തി ഖരമുനി തേജസ്സുളള ഒരു ശിവലിംഗം വാങ്ങുകയും ഒറ്റചാട്ടത്തിന് എത്തുന്ന സ്ഥലത്ത് പ്രതിഷ്ഠിക്കുകയും ചെയ്തുവെന്നാണ് കരുതപ്പെടുന്നത്. ഒറ്റചാട്ടത്തിന് ശേഖരനെ പ്രതിഷ്ഠിച്ചസ്ഥലം ഒറ്റശേഖരമംഗലമെന്ന് അറിയപ്പെടുന്നു.
ഭക്തമനസ്സുകളില് വിശ്വാസത്തിന്റെയും അനുഗ്രഹത്തിന്റെയും പെരുമഴ പെയ്യിക്കുന്ന ഭഗവാന് ശ്രീമംഗലേശ്വരന് എന്നും പേരുണ്ട്. സംസ്കാരങ്ങള് സമ്മേളിക്കുന്ന ഈ ഗ്രാമം ക്ഷേത്രവിശ്വാസത്തിനൊപ്പം കലാപ്രവര്ത്തനങ്ങളുടെയും സാഹോദര്യത്തിന്റെയും കൂടി ഭൂമികയാണ്.
എങ്ങനെ എത്തിച്ചേരാം : നെയ്യാറ്റിൻകര താലൂക്കിലെ ഒറ്റശേഖരമംഗലം ചിറ്റാർ പുഴയുടെ തീരത്ത് സ്ഥിതി ചെയ്യുന്നു. തിരുവനന്തപുരത്ത് നിന്ന് കാട്ടാക്കട വഴി 30 കിലോമീറ്ററും നെയ്യാറ്റിൻകരയിൽ നിന്ന് വെള്ളറട വഴി 15 കിലോമീറ്ററും.