തിരുവനന്തപുരം : പുതുവത്സര ആഘോഷരാവിൽ കോവളത്ത് തിരക്ക് നിയന്ത്രിക്കാൻ പോലീസ് കൺട്രോൾ റൂമിൽ നിന്നുയർന്ന റഷ്യൻ ഭാഷയിലെ അനൗൻസ്മെന്റ് കൗതുകം പകർന്നു.സുരക്ഷ ക്രമീകരണങ്ങൾ ഏകോപിപ്പിക്കാനും കാമറകൽ സ്ഥാപിച്ച് തീരത്തെ സി.സി.ടി.വി ദൃശ്യങ്ങൾ നിരീക്ഷിക്കാനുമായി ഒരുക്കിയ കൺട്രോൾ റൂമിൽ നിന്ന് ഉച്ചഭാഷിണിയിലൂടെ ഉയർന്ന റഷ്യൻ, സ്പാനിഷ് ഭാഷകളിൽ വിദേശ വിനോദ സഞ്ചാരി നടത്തിയ അനൗൻസ്മെന്റാണ് കൗതുകം പകർന്നത്. ലിത്വാനിയൻ സ്വദേശിയായ ജിജി വാത്മീക് എന്ന 60 കാരനാണ് പോലീസിന് സഹായിക്കാനായി
സേവന സന്നദ്ധനായി രംഗത്തെത്തിയത്. കാേവളത്തുള്ള വിദേശ വിനോദ സഞ്ചാരികളിൽ ഏറെയും റഷ്യൻ സഞ്ചാരികളാണ്. റഷ്യക്കാർക്ക് റഷ്യൻ അല്ലാതെ ഇംഗ്ലീഷ് അടക്കമുളള മറ്റ് ഭാഷകൾ വശമില്ലാത്തത് കാരണമാണ് റഷ്യൻ ഭാഷയിൽ അനൗൻസ്മെന്റ് നടത്താൻ സന്നദ്ധത അറിയിച്ചെത്തിയ ജിജി വാത്മീകിന്റെ സേവനം പോലീസ് സ്വീകരിച്ചതെന്ന് തീരത്ത് സുരക്ഷയുടെ ചുമതല വഹിക്കുന്ന ഫോർട്ട് അസിസ്റ്റന്റ് കമ്മീഷണർ എസ്. ഷാജി പറഞ്ഞു.കഴിഞ്ഞ 10 വർഷമായി ക്രിസ്തുമസ് , ന്യൂ ഇയർ ആഘോഷങ്ങൾക്കായി കോവളത്ത് സ്ഥിരമായി എത്തുന്നയാളാണ് ലിത്വാനിയക്കാരനായ ഈ വിനോദ സഞ്ചാരി . നിലവിൽ ഇംഗ്ലീഷിലും മലയാളത്തിലും തീരത്ത് പോലീസിന്റെ നിർദ്ദേശങ്ങൾ അനൗൻസ് ചെയ്ത റിട്ട. എസ്.ഐ അനിൽ കുമാറിനൊപ്പമിരുന്നാണ് ജി.ജി.വാത്മീക് റഷ്യൻ, സ്പാനിഷ് ഭാഷകളിൽ റഷ്യൻ സഞ്ചാരികൽക്കുള്ള നിർദ്ദേശങ്ങൾ ഉച്ചഭാഷിണിയിലൂടെ മുഴക്കിയത്