പിറന്നു വീണ കോടിയേരി മുതൽ, അന്ത്യവിശ്രമം കൊള്ളുന്ന പയ്യാമ്പലത്തെ സ്മാരകശില്പം വരെ നീണ്ട വിപ്ലവ യാത്ര. സി.പി.എം നേതാവും മുൻ മന്ത്രിയുമായിരുന്ന കോടിയേരി ബാലകൃഷ്ണന്റെ ജീവിതം ഒന്നര മണിക്കൂർ ഡോക്യുമെന്ററി ആയി അവതരിപ്പിച്ചപ്പോൾ കാണികളുടെ മനസിൽ തെളിഞ്ഞത് ഒരു വിപ്ലവകാലം.
ടാഗോർ തിയേറ്ററിൽ ഇന്നലെ വൈകിട്ട് ’കോടിയേരി ഒരു ദേശം, ഒരു കാലം “ എന്ന ഡോക്യുമെന്ററിയുടെ പ്രത്യേക പ്രദർശനം കാണാൻ പ്രമുഖർ അടക്കം എത്തി. ഒളിവിലും തെളിവിലും ഒപ്പം ഉണ്ടായിരുന്ന ഉറ്റ സുഹൃത്തിനെ അനുസ്മരിച്ചുള്ള മുഖ്യമന്ത്രി പിണറായി വിജയന്റെ ആമുഖത്തോടെയാണ് തുടക്കം. ജനമനസിൽ ജീവിക്കുന്നിടത്തോളം യഥാർത്ഥ കമ്മ്യൂണിസ്റ്റ്കാരന് മരണമില്ലെന്ന് അദ്ദേഹം ആവർത്തിച്ചു. കൃഷിപ്പണി ചെയ്തും പാൽ വിറ്റും കഴിച്ച ബാല്യവും ഓണിയൻ ഹൈസ്കൂളിലെ വിദ്യാർത്ഥി രാഷ്ട്രീയവും തലശ്ശേരി ജഗന്നാഥ ക്ഷേത്രത്തിലെ ആദ്യ രാഷ്ട്രീയ പ്രസംഗവും മിന്നി മറഞ്ഞു. കോടിയേരിയുമായി അടുത്തബന്ധം പുലർത്തിയ പ്രമുഖരുടെ ഓർമ്മകൾ, അഭിമുഖങ്ങൾ, ഫോട്ടോഗ്രാഫുകൾ, തിരഞ്ഞെടുപ്പ് പ്രചാരണം, ജീപ്പ് റാലികൾ എന്നിവയും ഇടം നേടി. മുദ്രാവാക്യം വിളികളോടെയാണ് പ്രിയനേതാവിന്റെ ജീവിതം അണികൾ ഏറ്റുവാങ്ങിയത്. തിരശീലയിൽ കോടിയേരിയുടെ ചിത്രങ്ങൾ മിന്നി മറയവെ കുടുംബാംഗങ്ങുടെ കണ്ണുകൾ ഈറനണിഞ്ഞു.
നിർമ്മാണം ഭാര്യ വിനോദിനി കോടിയേരി ബാലകൃഷ്ണൻ. മക്കളായ ബിനോയ് കോടിയേരിയും ബിനീഷ് കോടിയേരിയും എക്സിക്യുട്ടീവ് പ്രൊഡ്യൂസർമാർ. രചനയും സംവിധാനവും ജിത്തു കോളയാട്. വിനോദിനീസ് കോടിയേരി ഫാമിലി കളക്ടീവ് ആണ് ഡോക്യുമെന്ററി പുറത്തിറക്കിയത്. മാതൃകാപരമായ സമർപ്പിത ജീവിതം നയിച്ച നേതാവാണ് കോടിയേരിയെന്ന് ഡോക്യുമെന്ററി കാണാനെത്തിയ സി.പി.എം സംസ്ഥാന സെക്രട്ടറി എം.വി.ഗോവിന്ദൻ പറഞ്ഞു. കുടുംബാംഗങ്ങളെ അനുമോദിക്കുകയും ചെയ്തു. സി.പി.എം കേന്ദ്ര കമ്മിറ്റി അംഗം എ.കെ.ബാലൻ ,സി.പി.എം ജില്ലാ സെക്രട്ടറി വി.ജോയ്,മേയർ ആര്യാ രാജേന്ദ്രൻ, സംസ്ഥാന കമ്മിറ്റി അംഗങ്ങളായ കെ.എസ്.സുനിൽകുമാർ, കെ.എൻ.ഗോപിനാഥ്, എം.എൽ.എമാരായ ചാണ്ടി ഉമ്മൻ, ഐ.ബി.സതീഷ്, കടകംപള്ളി സുരേന്ദ്രൻ,വി.കെ.പ്രശാന്ത്,കെ.ആൻസലൻ, സി.കെ.ഹരീന്ദ്രൻ തുടങ്ങിയവർ കാണാനെത്തി.
![](https://keralitenews.com/wp-content/uploads/2023/11/KODIYERI-ORU1-1024x460.jpg)