ലോക്സഭാ തിരഞ്ഞെടുപ്പ് പ്രചാരണത്തിനു തുടക്കം കുറിച്ച് തൃശൂര് തേക്കിന്കാട് മൈതാനത്ത് നേടന്ന കോണ്ഗ്രസ്സിന്റെ മഹാജന സഭ കോണ്ഗ്രസ് ദേശീയ അധ്യക്ഷന് മല്ലികാര്ജുന് ഖാര്ഗെ ഉദ്ഘാടനം ചെയ്തു.
സംസ്ഥാനത്തെ 25,177 ബൂത്തുകളില് നിന്നു മൂന്ന് പേര് അടങ്ങുന്ന 75,000 ത്തില്പ്പരം പ്രവര്ത്തകരും മണ്ഡലം മുതല് എ ഐ സി സി തലം വരെയുള്ള കേരളത്തിലെ ഭാരവാഹികളും അണിനിരന്ന മഹാജനസഭ പ്രധാനമന്ത്രി നരേന്ദ്രമോദി രണ്ടുവട്ടം വന്ന് ഇളക്കി മറിച്ച തൃശൂരിനു കോണ്ഗ്രസ്സിന്റെ മറുപടിയായി.
കേന്ദ്ര സര്ക്കാരിനെതിരെ രൂക്ഷ വിമര്ശനമാണ് കോണ്ഗ്രസ് അധ്യക്ഷന് മല്ലികാര്ജുന് ഖര്ഗെ ഉയര്ത്തിയത്. ഫെഡറലിസത്തെ തകര്ക്കാനാണ് കേന്ദ്ര സര്ക്കാര് ശ്രമിക്കുന്നതെന്ന് ഖര്ഗെ കുറ്റപ്പെടുത്തി. മോദി സര്ക്കാരിന്റെ നയങ്ങള് ന്യൂനപക്ഷങ്ങളെയും വനിതകളെയുമാണ് കൂടുതല് ബാധിച്ചത്. യുവാക്കള് തൊഴില് രഹിതരായി. ഭരണഘടനാ മൂല്യങ്ങളെ സംരക്ഷിക്കാന് ഐക്യത്തോടെ മുന്നോട്ട് പോകണം. നെഹ്റു വിഭാവനം ചെയ്ത സ്വകാര്യ, പൊതു സഹകരണ മേഖലകള് സമ്മിശ്ര സമ്പദ് വ്യവസ്ഥ അട്ടിമറിച്ചു.
പൊതുമേഖലാ സ്ഥാപനങ്ങള് ദശലക്ഷങ്ങള്ക്കു തൊഴില് നല്കിയിരുന്നു. പിന്നാക്ക, ദിലിത് വിഭാഗങ്ങള്ക്ക് തൊഴിലിലൂടെ മുന്നോട്ടുവരാനായി. എന്നാല് മോദി സ്വകാര്യ മേഖലയെ പരിലാളിക്കുന്നു. മറ്റ് മേഖലകളെ സ്വാഭാവിക മരണത്തിന് വിട്ടു കൊടുത്തു. പൊതുമേഖലയ്ക്ക് തളര്ച്ചയുണ്ടായാല് തിരികെയെത്തിക്കാനുള്ള ഉത്തരവാദിത്തം സര്ക്കാരിനുണ്ട്. എന്നാല് മോദി പൊതുമേഖലയെ തകര്ക്കുകയും സ്വകാര്യ മേഖലയെ ശക്തിപ്പെടുത്തുകയും ചെയ്യുന്നു. ഏതാനും സ്വകാര്യ മുതലാളിമാരെ പരിലാളിക്കുന്നു.
പണപ്പെരുപ്പം ദിനംപ്രതി വര്ധിക്കുന്നു. തൊഴിലില്ലായ്മ കൂടി കൂടുമ്പോള് സാധാരണക്കാരുടെ ഭരണം മോദി ഭരണത്തില് ദുരിതപൂര്ണമാകുന്നു. വിലക്കയറ്റം രൂക്ഷമായി. പാചക വാതക വില 400 രൂപയില് നിന്ന് 1,600 ആയി. കോര്പ്പറേറ്റുകള്ക്കും ധനികര്ക്കുമായി കോടാനുകോടി എഴുതിത്തളളുന്നു. സബ്സിഡി ധനികര്ക്കുമാത്രമാക്കിയെന്നും അദ്ദേഹം പറഞ്ഞു.
കോണ്ഗ്രസ് കൂടുതല് തൊഴില് സൃഷ്ടിക്കും. എല്ലാവരെയും ഉള്ക്കൊളളുന്ന നയമാകും കോണ്ഗ്രസിന്റെത്. ബി ജെ പിയുടെ രാഷ്ട്രീയ തന്ത്രം തിരിച്ചറിയണം. മതത്തിന്റെ പേരില് വോട്ടു വാങ്ങാനെത്തുന്നവര് സ്ത്രീ വിരുദ്ധരാണെന്നു സഹോദരിമാര് തിരിച്ചറിയണം. സ്ത്രീകള്ക്കും ന്യനപക്ഷങ്ങള്ക്കെതിരായ അക്രമം വര്ധിച്ചു. ഓരോ മണിക്കൂറിലും 51 സ്ത്രീകള്ക്കെതിരെ അക്രമം നടക്കുന്നു എന്നാണു കണക്കുകള്. അക്രമികളെ സംരക്ഷിക്കുകയാണ് മോദി സര്ക്കാര്.
മണിപ്പൂരിലെ ബലാത്സംഗങ്ങളും അക്രമങ്ങളും രാജ്യത്തെ നാണക്കേടിലേക്കു തള്ളിവിട്ടു. കഴിഞ്ഞ ഒമ്പതു മാസമായി നടക്കുന്ന അക്രമം തടയാന് കേന്ദ്രം തയാറാവുന്നില്ല. പ്രധാനമന്ത്രി മണിപ്പൂരിലേക്കു പോയില്ലെന്നും ഖര്ഗെ കുറ്റപ്പെടുത്തി.