തിരുവനന്തപുരം: ഗവര്ണറുടെ സുരക്ഷയ്ക്കായുള്ള ആദ്യ സിആര്പിഎഫ് സംഘം രാജ്ഭവനില് എത്തി. 30 പേരടങ്ങുന്ന ബാച്ചാണ് തിരുവനന്തപുരത്തെത്തിയത്. കൊല്ലം നിലമേലിലലെ എസ്എഫ് ഐ പ്രതിഷേധത്തിന് പിന്നാലെയാണ് കേന്ദ്ര ആഭ്യന്തര മന്ത്രാലയം ഇടപെട്ട് ഗവര്ണറുടെ സുരക്ഷ വര്ധിപ്പിക്കനുള്ള തീരുമാനമെടുത്തത്. സംഘര്ഷത്തിന് പിന്നാലെ ആഭ്യന്തര മന്ത്രി അമിത് ഷായുടെ സെക്രട്ടറിയെ വിളിച്ച് ഗവര്ണര് പരാതി പറഞ്ഞിരുന്നു. തുടര്ന്നാണ് Z പ്ലസ് കാറ്റഗറി സുരക്ഷ ഒരുക്കിയത്.
നിലവില് കേരള പൊലിസാണ് ഗവര്ണര്ക്ക് സുരക്ഷയൊരുക്കുന്നത്. Z പ്ലസ് കാറ്റഗറിയിലേക്ക് മാറ്റിയതോടെ 55 അംഗ സുരക്ഷാ സേനയാകും ഗവര്ണറുടെ സുരക്ഷാ ചുമതല വഹിക്കുക. പത്തിലേറെ കമാന്ഡോകളും ഇതില് ഉള്പ്പെടും. പുതുതായി അഞ്ചിലേറെ ബുള്ളറ്റ് പ്രൂഫ് വാഹനങ്ങള് അടങ്ങിയ വാഹനവ്യൂഹവും ഗവര്ണറെ അനുഗമിക്കും.
അതേസമയം ഗവര്ണര്ക്കെതിരെ പ്രതിഷേധം ശക്തമാക്കാനുള്ള തയ്യാറെടുപ്പിലാണ് എസ്.എഫ്.ഐ. കൊല്ലത്തിന് പുറമെ തിരുവനന്തപുരത്തും ഗവര്ണര്ക്കെതിരെ എസ്എഫ് ഐ പ്രവര്ത്തകര് പ്രതിഷേധവുമായെത്തി. സംഭാരവുമായി പ്രതിഷേധിക്കാന് നിന്ന എസ്.എഫ്.ഐ പ്രവര്ത്തകരെ പൊലിസ് കസ്റ്റഡിയിലെടുത്തു.