മധ്യപ്രദേശ് നിയമസഭാ തിരഞ്ഞെടുപ്പിനുള്ള പ്രകടനപത്രിക പുറത്തിറക്കി കോണ്ഗ്രസ്. ബി.ജെ.പിയില്നിന്ന് ഭരണം പിടിക്കാനൊരുങ്ങുന്ന കോണ്ഗ്രസ് സംസ്ഥാനത്ത് വലിയ വാഗ്ദാനങ്ങളുമായാണ് പത്രിക പുറത്തിറക്കിയിരിക്കുന്നത്. 106 പേജുള്ള ‘വചന് പത്ര’യില് 59 വാഗ്ദാനങ്ങളാണ് ഉള്ളത്. 10 ലക്ഷത്തിന്റെ ആക്സിഡന്റ് കവര് ഉള്പ്പെടെ 25 ലക്ഷം രൂപയുടെ ആരോഗ്യ ഇന്ഷുറന്സ്, സര്ക്കാര് ജോലിയിലും വിദ്യാഭ്യാസസ്ഥാപനങ്ങളിലും 27% ഒ.ബി.സി. സംവരണം, സംസ്ഥാനത്തിന് ഐ.പി.എല്. ടീം എന്നിവയാണ് പത്രികയിലെ പ്രധാനവാഗ്ദാനങ്ങള്. ക്വിന്റലിന് 2,500 രൂപ നിരക്കില് നെല്ലും 2,600 രൂപ നിരക്കില് ഗോതമ്പും സര്ക്കാര് കര്ഷകരില്നിന്ന് സംഭരിക്കും. നെല്ലിന് 3,000 രൂപ ഉറപ്പുവരുത്താനാണ് ലക്ഷ്യമെന്നും കമല്നാഥ് അറിയിച്ചു.