നിരക്ക് കുറയുമ്പോൾ രജിസ്റ്റർ ചെയ്യുന്ന വാഹനങ്ങളുടെ എണ്ണം കൂടും. അതിലൂടെ കൂടുതൽ വരുമാനം നേടാനാകുമെന്നാണ് കണക്കുകൂട്ടൽ. നിലവിൽ വാഹന രജിസ്ട്രേഷന് ഏറ്റവും കൂടുതൽ തുക ഈടാക്കുന്നത് കേരളത്തിലാണ്. ഇതു കാരണം ഇവിടെ രജിസ്റ്റർ ചെയ്യേണ്ട ടൂറിസ്റ്റ് ബസുകൾ പോലും നികുതി താരമ്യേന കുറവുള്ള നാഗലാന്റ്, അരുണാചൽപ്രദേശ് തുടങ്ങിയ സംസ്ഥാനങ്ങളിൽ രജിസ്റ്റർ ചെയ്യുകയും കേന്ദ്ര സർക്കാർ അനുവദിച്ചിട്ടുള്ള ഓൾ ഇന്ത്യ പെർമിറ്റ് ഉപയോഗിച്ച് കേരളത്തിലും സർവീസ് നടത്തുകയുമാണ് ചെയ്യുന്നത്.ബസുകൾ മറ്റ് സംസ്ഥാനങ്ങളിൽ രജിസ്റ്റർ ചെയ്യുന്നതിലൂടെ സംസ്ഥാനത്തിന് നികുതി നഷ്ടമുണ്ടാകുന്നതിനുപുറമെ, രജിസ്ട്രേഷൻ, ഫിറ്റ്നസ് ടെസ്റ്റ് ഫീസ് എന്നിവയിലും നഷ്ടമുണ്ടാകുന്നുണ്ടെന്നും സർക്കാർ വിലയിരുത്തി. ഇത്തരത്തിലുള്ള ബസുകളുടെ രജിസ്ട്രേഷൻ കേരളത്തിൽ തന്നെ നടത്തുന്നുവെന്ന് ഉറപ്പാക്കുന്നതിനായാണ് ടൂറിസ്റ്റ് ബസുകളുടെ നികുതിയിൽ കുറവ് വരുത്താൻ തീരുമാനിച്ചിരിക്കുന്നതെന്ന് ധനമന്ത്രി കെ.എൻ.ബാലഗോപാൽ ബഡ്ജറ്റ് പ്രഖ്യാപനത്തിൽ വ്യക്തമാക്കി. ഏപ്രിൽ മുതൽ ഇത് നിലവിൽ വരും.