പാകിസ്ഥാനെ രണ്ട് വിക്കറ്റിന് തോല്പ്പിച്ച് ശ്രീലങ്ക ഏഷ്യ കപ്പ് ക്രിക്കറ്റ് ഫൈനലില് ഇന്ത്യയെ നേരിടും. മഴ മൂലം 42 ഓവര് വീതമാക്കിയ മത്സരത്തില് പാകിസ്താന് ഏഴ് വിക്കറ്റിനാണ് 252 റണ്ണെടുത്തത്. 73 പന്തില് രണ്ട് സിക്സറും ആറ് ഫോറുമടക്കം 86 റണ്ണുമായി പുറത്താകാതെനിന്ന വിക്കറ്റ് കീപ്പര് ബാറ്റര് മുഹമ്മദ് റിസ്വാനാണു ടീമിനെ മികച്ച സ്കോറിലെത്തിച്ചത്. ഇഫ്തിഖര് അഹമ്മദും (40 പന്തില് രണ്ട് സിക്സറും നാല് ഫോറുമടക്കം 47) റിസ്വാനും ചേര്ന്നാണു ടീമിനെ തകര്ച്ചയില്നിന്നു രക്ഷിച്ചത്.
അഞ്ചാം ഓവറില് തന്നെ ഓപ്പണര് ഫഖര് സമാനെ (4) പാകിസ്താനു നഷ്ടമായിരുന്നു. രണ്ടാം വിക്കറ്റില് ഷഫീഖും ക്യാപ്റ്റന് ബാബര് അസമും (29) ചേര്ന്ന് 64 റണ്സ് കൂട്ടിച്ചേര്ത്തു. ബാബറിനെ പുറത്താക്കി ഇന്ത്യയ്ക്കെതിരെ അഞ്ച് വിക്കറ്റ് നേടിയ ദുനിത് വെല്ലാലാഗെയാണ് കൂട്ടുകെട്ട് പൊളിച്ചത്. പിന്നാലെയാണ് റിസ്വാന് ക്രീസിലെത്തിയത്. ഷഫീഖ്, മുഹമ്മദ് ഹാരിസ് (3), മുഹമ്മദ് നവാസ് (12) എന്നിവര് പുറത്തായതിനു പിന്നാലെ ആറാം വിക്കറ്റില് റിസ്വാന് ഇഫ്തിഖര് കൂട്ടുകെട്ടാണ് പാകിസ്താനെ മികച്ച ടോട്ടല് കണ്ടെത്താന് സഹായിച്ചത്. ഇരുവരും ചേര്ന്ന് 108 റണ്സ് കുട്ടിച്ചേര്ത്തു. ശ്രീലങ്കയ്ക്കായി മതീഷ പതിരണ മൂന്നു വിക്കറ്റും പ്രമോദ് മദുഷന് രണ്ടു വിക്കറ്റും മഹീഷ് തീക്ഷ്ണ, ദുനിത് വെല്ലാലാഗെ എന്നിവര് ഓരോ വിക്കറ്റ് വീതവും വീഴ്ത്തി.
ഇന്ത്യയ്ക്കെതിരായ മത്സരത്തിനിടെ പരുക്കേറ്റ പാക്ക് പേസര്മാരായ ഹാരിസ് റൗഫും നസീം ഷായും ശ്രീലങ്കയ്ക്കെതിരെ ഇറങ്ങില്ല. മുഹമ്മദ് വസിം, സമാന് ഖാന് എന്നിവരെ ഇവര്ക്കു പകരക്കാരായി ടീമില് ഉള്പ്പെടുത്തിയിട്ടുണ്ട്.
ശ്രീലങ്കന് ടീമും മാറ്റങ്ങളോടെയാണ് ഇറങ്ങിയത്. സൂപ്പര് ഫോറില് ഇരു ടീമുകള്ക്കും രണ്ടു പോയിന്റ് വീതമുണ്ട്. ഇന്നത്തെ മത്സരത്തില് ജയിക്കുന്ന ടീം ഫൈനലില് കടക്കും. സൂപ്പര് ഫോറിലെ രണ്ടു മത്സരങ്ങള് ജയിച്ച ഇന്ത്യ നേരത്തെ ഫൈനലില് പ്രവേശിച്ചിരുന്നു.